የድሬዳዋ ነፃ ንግድ ቀጣና በሙሉ አቅሙ ስራ ሊጀምር ነው

የንግድና ቀጣናዊ ትስስር ሚኒስቴር ሚኒስትር አቶ ገብረመስቀል ጫላ የድሬዳዋ ነፃ ንግድ ቀጣና ውስጥ የሚገኙና በተለያዩ የማምረቻው ዘርፎች ላይ የተሰማሩ ሀገር በቀልና አለም አቀፍ ባለሀብቶች ያሉበትን የምርት እንቅስቃሴን የጎበኙ ሲሆን አሁን ላይ የድሬዳዋ ነፃ ንግድ ቀጣና በሙሉ አቅሙ ስራ ለመጀመርና የሎጀስቲክስና የንግድ ኢንቨስትመንቶችን ማስተናገድ በሚችልበት ቁመና ላይ እንደሚገኝ ገልጸዋል፡፡

የኢንዱስትሪ ፓርኮች ልማት ኮርፖሬሽን የድሬዳዋ ነፃ ንግድ ቀጣናን በአጭር ግዜ ዉጤታማ ለማድረግና በሙሉ አቅሙ ወደ ስራ እንዲገባ ያከናወናቸው ስራዎች አበረታች ናቸው ያሉት ሚኒስትሩ ነፃ ንግድ ቀጣናው በስራ እድል ፈጠራ፤ ተኪ ምርቶችን በማምረት፤ በቴክኖሎጂና በእውቀት ሽግግር የደረሰባቸው አበረታች ውጤቶች የሚደነቁ ናቸዉ ብለዋል።

ሚኒስትሩ አክለውም በቅርቡ በሙሉ አቅሙ ስራ እንዲጀምር በሎጀስቲክስ በንግድ በገቢና ወጪ ዙሪያ የተደረጉ ቅድመ ዝግጅቶች ተጠናክረዉ መቀጠል እንዳለባቸዉ ገልጸው ሰሞኑን እየተካሄደ የሚገኘው የባለድርሻ አካላት ውይይት ግብዓት እንደሚሆንም ጠቁመዋል። በጉብኝቱ የኢንዱስትሪ ፓርኮች ልማት ኮርፖሬሽን ዋና ስራ አስፈፃሚ አቶ አክሊሉ ታደሰ እና ሌሎች የኮርፖሬሽኑ አመራሮች ተገኝተዋል።