ኢትዮጵያ በዚህ አመት 200 ቶን አቮካዶ ኤክፖርት ለማድረግ አቅዳ፤ 170 ቶን አቮካዶ ለውጪ ገበያ ኤክስፖርት እንዳደረገች ተገለጸ።
ይህ የተገለጸው ዛሬ የኢትዮጵያ ፓርላማ የግብርና ጉዳዮች ቋሚ ኮሚቴ ከክልሎች ጋር በወቅታዊ የአፈር ማዳበሪያ አቅርቦት እና ስርጭት ዙሪያ ባደረገው ውይይት ላይ ነው። በውይይት መድረኩ ላይ የ2014 የበልግና የመስኖ ስራ አፈጻጸም ሪፖርት በግብርና ሚኒስቴር እርሻና ሆርቲካልቸር ዘርፍ ሚኒስትር ዴኤታ በዶ/ር መለስ መኮንን ቀርቧል፡፡ እቅዱ የበልግ አብቃይ በሆኑ ክልሎች በመለየት የብሄራዊ ሜትሮሎጂ ትንበያዎችን ከግምት በማስገባት በበጋ የመስኖ ስንዴን በ405 ሺህ ሄክታር መሬት ላይ በማልማት በመጀመሪያው ዙር ብቻ 16 ሚሊዮን ኩንታል ምርት እንደሚገኝ ይህም በየአመቱ የምርት ጭማሪ እየታየበት መምጣቱ አስረድተዋል፡፡
አያይዘውም ከስንዴ ልማቱ ጎን ለጎን በአትክልትና ፍራፍሬ ልማቱ ትኩረት ተሰጥቶ እየተሰራ እንደሚገኝ ተናግረዋል። የምርጥ ዘር እጥረት ለመቅረፍ ከክልሎች እና ከምርምር ተቋማት ጋር አበክሮ እንደሚሰራ ጠቁመዋል፡፡
በግብርና ሚኒስቴር የኢንቨስትመንትና ግብዓት ዘርፍ ሚኒስትር ደኤታ ክብርት ዶ/ር ሶፊያ ካሳ በበኩላቸው የግብርና ምርትና ምርታማነት ለማሳደግ ማደበሪያ ወሳኝ እንደመሆኑ መጠን በቅድመ ፍላጎት ዳሰሳ ጥናት ተደረጎ ከጦርነት በፊት ግዢ መፈፀሙ መልካም አጋጣሚ ሆኗል ብለዋል፡፡ ለአፈር ማዳበሪያ ግዥ 1 ቢሊዮን ዶላር ከመንግስት ተፈቅዶ የ12.8 ሚሊዮን ኩንታል ግዥ ተከናዉኖ 4.3 ሚሊዮን ኩንታል ወደብ የደረሰ ሲሆን 3.5 ሚሊዮን ኩንታል ክልሎች ደርሶ 4.95 ሚሊዮን ለአርሶአደሮች መሰራጨቱን ገልፀዋል።
ለአፋር እና ለሶማሌ ክልሎች እንዲሁም በግብርና ለተሰማሩ ግል ባለሃብቶች በግብርና ስራዎች ኮሮፖሬሽን በኩል እየቀረበ እንደሚገኝ አብራርተዉ ከዉጭ የሚገባዉ ማዳበርያ በወቅቱ እንዲደርስ ጥብቅ ክትትል እየተደረገ እንደሚገኝና ክልሎች የደረሰዉ ማዳበሪያም ለአርሶአደሩ እንዲሰራጭ ከክልሎች ጋር በመቀናጀት በትኩረት እየተሰራ መሆኑን አክለዉ ገልፀዋል።
የኢንስፔክሽን ቡድኑና ተሳታፊ የቋሚ ኮሚቴ ሰብሳቢዎች የተለያዩ ጥያቄዎችና ምክረ ሃሳቦች አቅርበዋል ከተሰጡት ሀሳቦች መካከል ህገ-ወጥ ማዳበሪያ ሽያጭ ቁጥጥርና ዋጋ ጭማሪ ላይ፣ የአፈር ማዳበሪያዎች በመጋዘኖች የሚከማቹበት ሁኔታ ምክኒያት ቢጠና፣ ምርጥ ዘር ከመጠቀም ጎን ለጎን ነባር የሰብል ዝርያዎች ቢታሰብበት፣ በዝናብ እጥረት፣ በአንበጣ ፣ በድርቅና በጦርነት የተጎዱ አካባቢዎች ያሉ አርሶናአርብቶ አደሮች በግብርና ግብዓቶች ዙሪያ የተለየ ድጋፍ በመንግስትም ሆነ በግብርና ሚኒስቴር ሊያደረግላቸው እንደሚገባ ኮሚቴው አሳስቧል።
በመጨረሻም ለተነሱት ጥያቄዎች ከግብርና ሚኒስቴር ክፍተኛ አመራሮች በኩል ምላሽ ተሰጥቷል፡፡ ጌዜው በሚጠየቀው መልኩ ጥናት በማድረግ ግብርናን ለማዘመን የፖሊሲ ማሻሻያ ማድረጉና የተለያዩ አዋጆች በምክር ቤቱ እንዲጸድቁለት ያቀረበ መሆኑን ተገልጻል፡፡
ኢትዮጵያ በተለይ በስንዴ ምርት ያለባትን የምርት ክፍተት በዚህ ዓመት ለመሸፈን ጥረት የሚደረግ ሲሆን በቀጣይ አመታት ከበቂ ምርት በላይ በማምረት ለውጭ ገበያ የሚቀረብበት ደረጃ ለመድረስ ሰፊ ርብርብ እንደሚደረግ ተገልፅዋል። ግብርና ሚኒስቴር መስሪያ በጦርነት ለተጎዱ ከዋግኅምራ እስከ ሰሜን ሸዋ ዞኖች ላሉ አካባቢዎች 133 ሚሊዮን ብር ማድረጉና ሌሎችም ምላሾች ተሰጥቶ የግብርና ጉዳዮች ቋሚ ኮሚቴ ሰብሳቢ የቀጣይ የስራ አቅጣጫ በማስቀመጥ የውይይት መድረኩ ተጠናቅቋል፡፡