10ኛው የደኢህዴን ድርጅታዊ ጉባኤ መካሄድ ጀመረ

10ኛው የደኢህዴን ድርጅታዊ ጉባኤ መካሄድ ጀመረ

የአማርኛ-ዜና

የደቡብ ኢትዮጵያ ህዝቦች ዴሞክራሲያዊ ንቅናቄ /ደኢህዴን/ 10ኛ ድርጅታዊ ጉባዔ በሀዋሳ ከተማ መካሄድ ጀምሯል።ድርጅታዊ ጉባዔው እንደ ሀገር እና እንደ ክልል የተጀመረውን ለውጥ የሚያስቀጥሉ አዳዲስ አመራሮቸን እንደሚያደራጅ እምነት እንዳላቸው የድርጅቱ ሊቀ መንበር ወይዘሮ ሙፈሪያት ካሚል ገልፀዋል።

በዛሬው እለት የተጀምረው 10ኛ ድርጅታዊ ጉባዔ እስከ መስከረም 21 2011 ዓ.ም ድረስ እንደሚካሄድም ድርጅቱ አስታውቋል።

በድርጅታዊ ጉባዔው ላይ በሀገሪቱ ያለውን የለውጥ ጉዞ ተጠናክሮ እንዲቀጥል የሚያስችል ውሳኔዎች እንደሚተላለፉበትም ደኢህዴን ገልጿል።

እንዲሁም ሀገራዊ ለውጡን በብቃት እንዲሳካ ማድረግ፣ የንቅናቄው የቀደሙ ጉባኤዎች ውሳኔዎች አፈፃፀምም በመገምገም ቀጣይ አቅጣጫ ማስቀመጥም የጉባዔው አጀንዳዎች ናቸው።

ደኢህዴን ያስጠናቸው የለውጥ መሠረታዊ እቅዶች ላይ ምክክር የሚደረግ ሲሆን፥ በፖርቲ ግንባታ ጥናት ስር የአርማ የስያሜና የህገ ደንብ ጉዳዮች ላይ ጉባሄው ይወያያል ነው ያሉት።

በተጨማሪም በድርጅታዊ ጉባዔው የንቅናቄውን ሊቀ መንበርና ምክትል ሊቀመንበር እንዲሁም የማእከላዊ ኮሚቴ እና የኢህአዴግ ስራ አስፈፃሚ ኮሚቴ አባላት ምርጫም ይካሄዳል።

በ10ኛ ድርጅታዊ ጉባሄ ላይ ከ1 ሺህ በላይ ተሳታፊዎች የሚታደሙ ሲሆን፥ ከእነዚህም ውስጥ 800 በድምፅ እንደሚሳተፉም ተገልጿል።

(በኤፍ.ቢ.ሲ)